‘ಅವಳು’

‘ಅವಳು ’

ಅವಳು’

ಅವಳೆಂದರೆ

ಮರುಗುವವಳು, ಕೊರಗುವವಳು

ಮಾತು-ಮಾತಿಗೂ ಅಳುತ್ತಾ ಕೂರುವವಳು;

ಅವಳೆಂದರೆ

ತಗ್ಗುವವಳು, ಬಗ್ಗುವವಳು

ಎಲ್ಲದಕ್ಕೂ ತಲೆಯಾಡಿಸುತ್ತಲೇ ಇರುವವಳು

ಭಾವನೆಗಳಿಗೆ ಶೀಘ್ರ ಪ್ರತಿಕ್ರಿಯಿಸುವವಳು;

ಅವಳೆಂದರೆ

ಮಾತೃಸ್ವರೂಪಿ,

ದಯಾಮಯಿ, ಕ್ಷಮಯಾಧರಿತ್ರಿ

ಅಬ್ಬಾ…! ಇನ್ನೂ ಅದೆನೇನೋ…,

ಹೆಣ್ಣೆಂದರವಳಾ?

ಅವಳೆಯಾ ನಿಮ್ಮ ಆ ಹೆಣ್ಣೆಂಬ ರೂಪ!

ಹೆಣ್ಣೆಂದರವಳು

ಕೈಲಾಗದವಳಾ? ಕೈಮುಗಿಯುವವಳಾ?

ಕೈ ಕಟ್ಟಿ ಕೂರುವವಳಾ? ಎಲ್ಲರ ಮುನಿಸನ್ನು ತಡೆಯುವವಳಾ?

ಹಡೆಯಲು ಯೋಗ್ಯಳಾದವಳಾ?

ಹೆಣ್ಣೆಂದರವಳಾ?

ಅವಳೆಯಾ ನಿಮ್ಮ ಆ ಹೆಣ್ಣೆಂಬ ಸ್ವರೂಪ!

ಸೂಕ್ಷ್ಮ ಮನಸ್ಸಿನವಳು

ಅಂದ-ಚೆಂದಕ್ಕೆ ಮನಸೋಲುವವಳು

ಅಲಂಕಾರದಲ್ಲೇ ದಿನಕಳೆವವಳು

ಕನ್ನಡಿಯನ್ನು ಸಂಗಾತಿಯಂತೆ ಪ್ರೀತಿಸುವವಳು

ಅವಳೆಂದರೆ ಉಬ್ಬು-ತಗ್ಗುಗಳ ರೂಪ

ಸುಮ್ಮಸುಮ್ಮನೆ ವಸ್ತ್ರ ಸರಿಪಡಿಸಿಕೊಳ್ಳುವವಳು

ಬಲು ನಾಜೂಕಿನವಳಪ್ಪ ಆ ಹೆಣ್ಣು..

ಹೆಣ್ಣೆಂದರೇ ಅವಳಾ?

ಅವಳೆಯಾ ನಿಮ್ಮ ಆ ಹೆಣ್ಣೆಂಬ ಸಾದೃಶ್ಯ!